1998年11月20日創刊 倫理•健康•祥和
行政院新聞局登記證局版臺省報字109號
中興日報全球新聞網
歷史名著「世說新語」寫盡了社會人文之真實面相
完整呈現善惡與真假沒有虛偽的教條令人體悟省思
記者 // 楊國顯 特稿
「世說 新語」是一 部展 示人 文社 會真相，顛覆 儒家 思想 的通 俗傑出文學作品，它產生於漢、魏、晉、宋時代，作者是南朝劉宋的宗室劉義慶先生，原文是以文言所寫出來的，故事非常的通俗精簡、而且優美與精彩，歷朝歷代都有不同的學者與專家，把它詳加校注，以白話中文的解說翻譯本也很多，常見的書名包括有︰世說新書、世說新語、晉宋奇談、六朝異聞，林林總總，不一而足，而真正屬於「臺語」的版本，目前為止，則似乎是還不多見，記者在翻譯此書時，為了明顯的將它區隔，仿照其他的各種國語版本，大膽的將其另行取名為臺語本的「六朝奇譚」，這個書名對原著「世說新語」本身來說，看起來倒也還相當的貼切，極為合適。 在劉義慶先生所創作的世說世界裡，可以看到當時赤裸裸，毫無掩飾的人文社會之實相，有善的也有惡的、有真的也有假的，毫不掩飾，他所提供的生活智慧，是完整而豐富的、而不是虛構完美的，也沒有任何教條，
例如︰史上永久流傳下來，對我們現代人來說，比較耳熟能詳，有啟示作用的，如「楚囚對泣」、「管甯割席」、「曹操提字」、「何充摘奸」、「袒腹東床」、「期期艾艾」……等等諸多的成語典故，全部的內容完全都是出自於「世說新語」這一本書的章節，當然，這也就是這本書最具高度的文學價值，與其他只重隱惡楊善、報喜不報憂的歷史文學作品，風格相比，截然不同，實在很值得現代的人來琢磨一番。
社會上其實一直都存在有很多令人疑惑的問題，是值得吾人去認真思考的，尤其是道德已漸淪喪，功利主義抬頭，價值觀嚴重混淆，笑貧不笑娼的當今社會，更顯得其必然性與重要性，譬如說︰「道德是什麼？什麼樣的人才是有道德？什麼叫會說話？什麼樣的人，才算是會說話？而不常說話的人，就是不會說話的人嗎！有知識的人，一定就有做事的能力嗎？是不是高學歷的人，對國家社會就會有更多的貢獻？而低學歷的人，是不是貢獻就會比較小呢！政治人物的人品道德標準，就一定高嗎？」凡此種種，似是而非的模糊概念，錯綜複雜，可說是非常的混亂，
難道不值得吾人認真的去作省思檢討嗎。 世說新語的原著，洋洋灑灑，總共約有五百多條的故事，這裡只是選擇其中的極小部份，不去作死板的直譯，而完全用「台語」的思考而作改寫，盡量講求通俗白話，也兼顧到其邏輯性、教化性、趣味性，沒有受到與原文相互對照的古板拘束，閱讀起來非常的順暢，就像在看故事書一樣，非常的輕鬆，此時此刻，反復的咀嚼，回味一下，看故事了解歷史，學台語了悟禪機，必然有助於的學習效果，何樂而不為。
《一》管甯割席斷交
【出處】世說新語〔六朝奇譚〕德行篇。
【典故】管甯佮華歆自細漢①是好朋友，一工，作伙佇菜園種菜，紲掘②著一塊金仔，管甯並無在意，將伊當作石頭，繼續掘伊个塗③，華歆將金仔搉④起來擲出去。擱一擺⑸，兩个作伙坐佇草席仔頂讀冊⑥，門外有一張豪華的車經過，管寧照常讀伊个冊，華歆忍袂稠趕緊將冊放冽，就走出去看。 經過兩擺的觀察，管甯就將草席仔割開，分開來坐，對華欣講︰「你毋是我个朋友呀」。
【注釋】①細漢〔se3 han3〕︰小時。②掘〔kut8〕︰挖掘。③塗〔thoo5〕︰土。④搉〔khioh4〕︰撿拾。⑤擱一擺〔koh8 tsit8 pann2〕︰再次。⑥讀冊〔thak8 tsheh4〕︰讀書。
《二》陳家難兄難弟
【出處】世說新語〔六朝奇譚〕德行篇。
【典故】太丘縣的縣長陳實，有生二个囡仔，表現攏介傑出，大漢後生①名叫做陳紀，字元方，細漢後生是陳諶，字季方，規家伙仔攏是芝蘭玉樹，真有名望。
有一工，陳元方个大漢囝陳群，佮陳季方个囝仔陳忠，兩個人佇彼，咧互相爭論，絪的序大人②个功德，相諍規晡③攏諍袂煞④，最後只好去請絪个阿公陳太丘，來作裁決⑤。 陳太丘聽了兩個孫仔个爭論，就笑笑仔佮絪講︰「恁兩個个是兄弟仔，講起來攏是蓋世的英才，元方做阿兄个，真毋簡單，抑若季方這個做小弟个，表現嘛非常的難得。」
【注釋】①後生〔hau7 senn1〕︰兒子。②序大人〔si7 tua7 lang5〕︰父親。③規晡〔kui1 poo1〕︰大半天。④袂煞〔be7 suah4〕︰不停。⑤裁決〔tshai5 kuat4〕︰仲裁。
《三》華歆機智救人
【出處】世說新語〔六朝奇譚〕德行篇。
【典故】華歆佮王朗，有一擺作伙去逃難，
半路拄著一個生份①人，要求予伊作伙上船，鬥陣②避難，華歆發現無啥妥當，就佮伊拒絕，王朗就講︰「船頂猶③閣有空位，予伊上船卡有要緊冽」！過了無偌久④，後面有水賊迮⑤過來，王朗就欲將彼個人趕落船，華歆就講︰「就是因
為懷疑，當初才毋予伊上船，既然已經接納伊矣，好歹嘛愛佮伊救到底才對，半路來放棄，佇道義上講袂過」。 就安呢⑥，就無佮彼個人趕落船去，繼續予伊坐，一路上足順風，也並無啥咪意外的代誌⑦來發生。
【注釋】①生份〔senn1 hun7〕︰陌生。②鬥陣〔tau3 tin7〕︰一起。③猶〔iah8〕︰還。④偌久〔gua7 ku2〕︰多久。⑤迮〔jiok4〕︰追趕。⑥安呢〔an1 nenn1〕︰這樣。⑦代誌〔tai7 tsi3〕︰事情。
《四》巨伯為友捨命
【出處】世說新語〔六朝奇譚〕德行篇。
【典故】荀巨伯是東漢桓帝時代个人，一生當中表現平平，也並無啥咪，較大个建樹佮功績。 有一擺朋友破病①，伊入城去佮欲看，紲拄著②番賊來攻城，朋友就叫伊趕緊逃走，伊講︰「我本來就是專工欲來關心你个，你現在有意外，我如果若欲來逃走，當初我何必千里迢迢趕來看你冽？」。賊仔入城了後，發現規个③城隴是空个，干單只暙絪兩个人，感覺足奇怪，就伊問︰「規城个人攏已經走了了矣，敢講④你毋驚死？」荀巨伯就佮伊回答講︰「毋是我毋驚死，是因為我个朋友病甲足嚴重，我實在走袂開跤⑤！」賊仔聽了非常的感動，就惦惦⑥仔來離開。
【注釋】①破病〔phua3 penn7〕︰生病。②紲拄著〔sua3 tu2 tioh8〕︰竟碰到。③規个〔kui1 e5〕︰整個。④敢講〔kam2 kong2〕︰難道。⑤走袂開跤〔tsau2 be7 khui1 kha1〕︰不忍離開。⑥惦惦〔tiam7 tiam7〕︰默默。
《五》陳蕃禮賢下士
【出處】世說新語〔六朝奇譚〕德行篇。
【典故】陳蕃的的作人誠正派，伊平常時的一言一行，攏會當①予所有个讀冊人，來當作模範，每一擺，伊若是欲上車，手牽韁索②的姿勢，真無平凡，看起來，確實有彼種③澄清天下个氣慨。 當伊就任江西南昌太守个時，車拄到，就馬
上問講︰「我欲先去看徐穉。」綴④佇身軀邊个秘書佮伊講︰「逐家个意思，是欲請太守先去府衙⑤，安頓予好勢⑥才講。」 陳蕃就應講︰「古早時代，武王禮賢商容，無惜旅途的辛勞。即馬我欲先去看名士徐穉，有啥咪袂使冽？」
【注釋】①會當〔e5 tang3〕︰可以。②牽〔khan1〕︰拉。③彼種〔hit4 tsiong2〕︰那種。④綴〔tue3〕︰跟隨。⑤府衙〔hu2 ge5〕︰官署。⑥好勢〔ho2 se3〕︰妥當。
《六》王恭身無長物
【出處】世說新語〔六朝奇譚〕德行篇。
【典故】王恭對會稽這個所在轉來①，王枕就專工去看伊，伊看著王恭，坐佇六尺長的竹席，就對伊講︰「你對浙東轉來，應該是有真濟這種的竹席卡對，毋知，會當送我一件無？」，王恭並無應話。 等候王枕走了後，王恭就將伊家己②所坐个彼張竹席，送予王枕，家己只坐草藁。王枕知影了後，心裡感覺真歹勢③，就講︰「我害叫④你是有足濟領的竹席，毋才敢開喙佮你討，實在有夠歹勢。」 王恭就佮伊講︰「你若是安呢⑤想，你實在就真無瞭解我，我一生作人，到今就毋捌⑥有啥咪值錢个物件。」
【注釋】①轉〔tng2〕︰回。②家己〔ka1 ti7〕︰自己。③歹勢〔phainn2 se3〕︰好意思。④害叫〔hai7 ko3〕︰以為。⑤若是安呢〔na3 si7 an1 ne1〕︰如果是這樣。⑥毋捌〔m7 bat4〕︰從來未有過。
《七》鄧艾期期艾艾
【出處】世說新語〔六朝奇譚〕言語篇。
【典故】鄧艾講話有重句①个習慣，每一擺若講著家己个名，就佇彼「艾、艾、艾……」無停。 晉文帝知影②伊有即種毛病，有一擺就佮伊講滾笑③︰「你每一擺都攏佇彼艾、艾……無停，我問你，你到底有幾个『艾』？」鄧艾笑笑仔講︰「古早人講『鳳兮鳳兮』，其實只是一个『鳳』爾爾④」。
【注釋】①重句〔ting7 ku3〕︰口吃。②知影〔tsai1 ia2〕︰知道。③講滾笑〔kong2 kun2 tshio3〕︰開玩笑。④爾爾〔niann7 niann7〕︰而已。
《八》邊讓顛倒慌亂
【出處】世說新語〔六朝奇譚〕言語篇。
【典故】邊讓是陳留地方个人，作人修養真介好，講的話嘛真有氣質，佇彼當時的地方上，真正非常受人尊重。有一擺，袁閬予人派來作陳留个太守，去佮邊讓見面，邊讓見著太守，紲①雄雄一時失去了分寸，行動舉止②惶亂無章，袁閬看在眼內，就故意甲詼③講︰「以前堯，咧欲聘請許由，許由態度非常的正常，現在你見著我，為啥咪 那會顛倒慌亂，行為佮平常時仔，完全攏無共款④冽」。邊讓就佮伊回答講︰「太守大人拄仔⑤才來到本地，我猶未受著大人个教示⑥，所以才會安呢，顛倒慌亂」。
【注釋】①紲〔sua3〕︰竟然。②舉止〔ki2 tsi2〕︰動作。③詼〔khue1〕︰調侃。 為啥咪〔ui2 siann1 mi2〕︰為何。④共款〔kang7 khuan2〕︰一樣。⑤拄仔〔tu2 a2〕︰剛剛。⑥教示〔kau3 si7〕︰教誨。 《九》新亭楚囚對泣 【出處】世說新語〔六朝奇譚〕言語篇。 【典故】東晉南渡了後，足濟①大家族攏移民來江南，若拄佇假期，天氣好的日子，攏會相招去建康城南爿②的新亭，郊遊野宴。當逐家坐佇草坪的頂面个時，周顗紲無張持③，佇彼怨歎講︰「雖然遮个風景袂歹，毋過佮北方完全是無共款。」眾人聽著伊安呢講，攏面仔相相④，目屎嘛流落來。 當時朝中的丞相王導，嘛有佇現場，看著眾人攏赫呢淡志⑤，悲傷怨歎，流目屎，就面仔變變，大聲佮逐家講︰「咱應該愛集中力量，光復失土才對，那會這呢無出息，甘願欲學楚國的囚犯，來咧哭冽」。
【注釋】①足濟〔tsok4 tse7〕︰很多。②南爿〔lam5 ping5〕︰南邊。③無張持〔bo5 tunn1 ti5〕︰突然。④相相〔so1 siong3〕︰面面相覷。⑤淡志〔tam3 tsi3〕︰消沈。
《十》鍾毓驚惶出汗
【出處】世說新語〔六朝奇譚〕言語篇。
【典故】鐘穉叔佮鍾士季，兩個的年紀，干單①十三歲，就足有名，魏文帝曹丕聽著風聲，就佮伊个老爸鍾繇講︰「你敢會當②叫你二個囝仔過來這一下，我足想欲見裀。」 伊的老爸講好，就佮二個後生，紲來晉見皇帝，穉叔見著皇帝了後，歸个面仔流甲攏是汗。文帝看到就問伊講︰「你卡會歸个面③仔攏是汗？」穉叔就應講︰「因為我的心裡，傷過恐惶④，所以汗自然就流出來。」 文帝就擱問士季講︰「抑你那會攏袂流汗？」士季就應講︰「因為驚嚇過度，所以汗紲毋敢⑤流出來。」
【注釋】①干單〔kan1 tann1〕︰只有。②會當〔e7 tang3〕︰可以。③歸面〔kui1 bin7〕︰滿臉。④恐惶〔khiong2 hong5〕︰懼怕。⑤毋敢〔m7 kann2〕︰不敢。
《十一》阮裕抱憾焚車
【出處】世說新語〔六朝奇譚〕德行篇。
【典故】阮裕有一張真豪華的車，平常時仔若有人來借，伊從來毋捌①講無答應，真有度量②。 有一擺有一個人，因為欲為伊个老母辦理喪事，足想欲借伊个車來使用，毋過，一直攏真歹勢③開喙④，所以，最後就無達成如伊个願望。 代誌⑤過了真久了後，阮裕才知影這件代誌，心裡甘苦⑥甲睏攏袂去，就將這張車，
用火來燒掉。
【注釋】①毋捌〔m7 bat4〕︰從未。②度量〔too7 liong7〕︰胸襟。③歹勢〔phainn2 se3〕︰不好意思。④開喙〔khui1 tshui3〕︰開口。⑤代誌〔tai7 tsi3〕︰事情。⑥甘苦〔kan1 khoo2〕︰難過。
《十二》徐穉應對從容
【出處】世說新語〔六朝奇譚〕言語篇。
【典故】徐穉佇九歲个時陣①，有一擺佇月亮下底面咧佚佗②，有人就問伊講︰「月亮裡底，如果若攏無其他啥咪物件，是毋是會擱較③光冽？」 徐穉思考了一絲仔④、就佮伊應講︰「這嘛無一定，你想人个目睭裡底，如果若無目睭仁，你看敢會有可能擱較光嗎？」
【注釋】①時陣〔si5 tsun7〕︰時候。②佚佗〔tshit4 tho5〕︰玩耍。③較〔khah4〕︰比較。④一絲〔tsit8 si1〕︰一點。
《十三》支公愛鶴放鶴
【出處】世說新語〔六朝奇譚〕言語篇。
【典故】支道林這个人，是蹛①佇剡東的仰山，伊平常時，非常愛鶴，有人就送予伊兩隻鶴仔囝。 鶴仔囝漸漸來大隻，就展開伊个翅仔想欲飛，道林為著欲保護伊，就將翅仔鉸掉②。這兩隻鶴仔想欲飛，紲安怎飛都飛欲走，就斡頭③來看伊，親像有一點仔後悔共款④。 道林看佇眼內，就足毋甘嘆聲講︰「既然有沖天之志的本事，你就無應該來予人作佚佗物⑤來佚佗⑥。」所以，就擱將這兩隻鶴仔个翅仔⑦飼予長，放予伊飛去，還伊个自由。
【注釋】①蹛〔tua3〕︰住。②鉸掉〔ka1 tiau7〕︰剪掉。③斡頭〔uat8 thau5〕︰轉頭。④共款〔kang7 khuan2〕︰一樣。⑤佚佗物〔tshit4 tho5 mih8〕︰玩物。⑥佚佗〔tshit4 tho5〕︰玩耍。⑦翅仔〔sit8 a2〕︰翅膀。
《十四》李喜坦率可喜
【出處】世說新語〔六朝奇譚〕言語篇。
【典故】晉朝李喜，是山西上黨地方个人，專門研究藝學，道行真懸①，司馬景王東征上黨个時，就將李喜帶轉來，予伊②中郎个官來做。 有一工景王就問李喜講︰「以前宣王，欲請你出來作官，你攏毋肯③，為啥咪即馬喚我請你，你會出來冽？」 李喜就佮伊應講︰「宣王欲請我出來做官，是用禮來款待我，我自然嘛用禮來應付伊个進退，現在你是用法來套佇④我个頷頸⑤你看我敢敢⑥個無來嗎？」
【注釋】①真懸〔tsin1 kuan5〕︰很高。②予伊〔hoo7 i7〕︰給他。③毋肯〔m7 khing2〕︰不答應。④套佇〔tho3 ti3〕︰套在。⑤頷頸〔am7 kun2〕︰脖子。⑥敢敢〔kam2 kann2〕︰怎麼敢。
《十五》元方責客無禮
【出處】世說新語〔六朝奇譚〕方正篇。
【典故】太丘長陳實，佮朋友約中午欲出門，到時朋友紲無來，伊就先來離開。
無偌久朋友趕來，就問拄仔佇門口佚佗个陳實七歲囝元方講︰「恁老爸有佇冽無？」元方答講︰「等你真久等無，已經先離開去。」朋友聽了就足受氣①講︰「佮人約束好好，那會擱②家己先來離開，有夠無意思。」元方聽著就講︰「講好中午欲見面，拖甲這陣才來，已經是失了信用，擱佇我个面頭前，罵阮个序大人③，更加無禮貌你敢知，擱講彼囉話，真正毋知影通見笑④！」 朋友知影這个囝仔，彼支喙有夠厲害，就落車⑤想欲牽伊个手，元方一聲就走入厝內，完全無欲擱插⑥伊，朋友嘛只好鼻仔摸冽來離開。
【注釋】①受氣〔siu7 khi3〕︰生氣。②擱〔koh8〕︰又。③序大人〔si7 tua7 lang5〕︰
長輩。④見笑〔kian3 siau3〕︰羞愧。⑤落車〔loh8 tshia1〕︰下車。⑥插〔tshap4〕︰理會。
《十五》郭淮夫妻情重
【出處】世說新語〔六朝奇譚〕方正篇。
【典故】郭淮的夫人，是太尉王凌之小妹，王凌背叛宣王，連坐①著小妹，消息傳來，文武攏②勸伊起兵留人，郭淮堅持無欲安呢③作。關中个百姓，感念伊个德政，幾仔萬④人一路陪伴。郭淮真無忍心，就派人去將夫人追回。 後來郭淮上書宣王請罪⑤，伊講︰「五子思念老母，無老母就無五子，抑嘛無我郭淮。」
宣王看了非常感動，就來赦免伊。
【注釋】①連坐〔lian5 tso7〕︰株連。②攏〔long2〕︰都。③安呢〔an1 nenn1〕︰這樣。④幾仔萬〔kui2 a2 ban7〕︰好幾萬。⑤請罪〔tshng2 tsue7〕︰自請處分。
《十六》辛毗金斧把關
【出處】世說新語〔六朝奇譚〕方正篇。
【典故】諸葛亮起兵北伐，佇武功縣个五丈原，佮司馬懿的軍隊對陣①，轟動了整個个關中地方。 諸葛亮用各種个方法，去刺激司馬懿，魏明帝恐驚司馬懿會凍袂條②出城去應戰，就派辛毗去監軍。毋過過幾仔工，攏無看著司馬懿，有出兵應戰个動靜③。 諸葛亮就擱④派人去探聽消息，知影有一个老頭兒，舉斧頭徛佇營門口，司馬懿个軍隊無法度通出來，諸葛亮就笑笑仔講︰「這个人一定是辛佐治無毋對⑤。」
【注釋】①對陣〔tui3 tin7〕︰交鋒。②凍袂條〔tong3 be7 tau5〕︰受不了。③動靜〔tong7 tsing7〕︰跡象。④擱〔koh4〕︰再。⑤無毋對〔tong7 tsing7〕︰沒有錯。
《十七》既偷何必行禮
【出處】世說新語〔六朝奇譚〕言語篇。
【典故】佇歷史因為讓梨故事留名个孔融，有二個後生①，大漢个六歲，細漢个干單②只有五歲。 有一工，五歲个細漢後生，利用絪老爸日時咧睏③个時， 走去眠牀跤④偷啉酒⑤，大漢囝看著就講︰「為啥咪無欲先向阿爸行禮了後才啉？」
【注釋】①後生〔hau7 senn1〕︰兒子。②干單〔kan1 tann1〕︰只有。③咧睏〔teh8 khun3〕︰在睡覺。④眠牀跤〔bin5 tsgng5 kha1〕︰牀下。⑤啉酒〔lim1 tsiu2〕︰啉酒。
《十八》諸葛靚重孝誼
【出處】世說新語〔六朝奇譚〕方正篇。
【典故】吳國人諸葛靚个老爸，予司馬昭刣死，晉朝消滅吳國了後，靚就搬去洛陽，無欲作官，擱定定將跤脊①頩坐向對洛水。 武帝个阿嬸是靚个大姊，武帝足來數念②伊，定定想欲找機會佮伊來見面，就請諸葛妃去叫靚來，兩個人佇太妃的房間內見面。 揖禮了後，就做伙啉酒，武帝講︰「細漢个時，作伙佚佗的代誌，毋知你猶會記即無？」靚一聽面仔變色回答講︰「我就是吞炭漆身③，嘛袂當改變我家己④，來服侍你。」講煞目屎直直流，武帝只好惦惦⑤仔來離開。
【注釋】①跤脊〔kha1 tsah4〕︰背部。②數念〔siau3 liam7〕︰想念。③吞炭漆身〔thun1 thuann3 tshat4 sin1〕︰變身啞巴厲鬼。④家己〔ka1 ti7〕︰自己。⑤惦惦〔tiam7 tiam7〕︰默默。
《十九》謝弈醇酒罰翁
【出處】世說新語〔六朝奇譚〕德行篇。
【典故】謝弈佇咧作剡縣的縣令時，有一个老大人犯法，謝弈就用酒來處罰伊，這個老大人，就一杯擱一杯，醉甲毋知人去，謝弈猶①擱無欲喝停。 伊有一個个小弟叫做謝安，彼个②時陣才拄仔③七、八歲爾爾，穿著青色布个衫仔褲，坐佇伊大兄个身軀邊，看著老大人，已經是醉甲真厲害，真毋甘④，就佮伊個阿兄講︰「阿兄，這个老大人實在真可憐，你那就安呢⑤來處罰伊冽！」 謝弈聽伊的小弟安呢⑤講，面仔才開始漸漸有帶著笑容，就講；「阿奴，你想欲放伊去嗎？」這就將這个老大人，放倒轉去⑥【注釋】①猶〔iah8〕︰還。②彼个〔hit4 e5〕︰
那個。③拄仔〔tu2 a2〕︰剛剛。④毋甘〔m7 kam1〕不忍。⑤安呢〔an1 nenn1〕這樣。⑥轉去〔tng2 khi3〕回去。
《廿》和嶠恥與同車
【出處】世說新語〔六朝奇譚〕方正篇。
【典故】晉武帝的時代，荀勗擔任朝廷的中書監，和嶠擔任中書令，彼个時陣中書監佮中書令，攏是坐共①一台車來上朝問政。 和嶠這个人，做人介正直②，無講私情，荀勗完全無共款，較會曉巴結人，為著這點，和嶠足看無起荀勗，認為若佮伊坐共一台車足見笑③。 有一擺欲上朝，和嶠先來上車，坐佇正面个中央，荀勗看已經無位通坐，就另外揣④車坐去上朝。對彼擺⑤開始，朝廷只好予中書監佮中書令，隨人各分配一台車。
【注釋】①共〔kang7〕︰相同。②正直〔tsng3 tit8〕︰剛正。③見笑〔kian3 siau3〕︰羞恥。④揣〔tshue7〕︰找。⑤彼擺〔hit4 painn2〕︰那一次。
《廿一》陸機不卑不亢
【出處】世說新語〔六朝奇譚〕方正篇。
【典故】盧志是范陽人，官作甲尚書郎，家族有聲望足自負。一擺伊佇眾人頭前，問陸機︰「毋知①陸遜、陸杭是你个啥咪人？」陸機輕鬆甲伊應答︰「就親像你佮盧毓、盧珽个關係共款②。」陸機个小弟士龍，聽盧志問話赫呢③無客氣，面色隨變，出來了後就佮伊阿兄講︰「有夠無禮貌，敢講絪④真影毋知嗎？」士衡就講︰「咱的祖先，名聞海內，絪那會毋知！只有鬼才敢安呢⑤！」當時个名賢咧欲評定二陸个好歹，謝安就以這个故事，來判斷二个姓陸个个懸下。
【注釋】①毋知〔m7 tsai1〕︰不知道。②共款〔kang7 khuan2〕︰一樣。③赫呢〔hiah4 ninn3〕︰那麼。④絪〔in7〕︰他們。 ⑤安呢〔an1 nenn1〕︰這樣。
《廿二》稽紹拒作伶人
【出處】世說新語〔六朝奇譚〕方正篇。
【典故】稽紹作侍中个時，一擺①去大將軍府裡開會，有人建議，欲請伊演奏音樂予逐家來欣賞，大將軍聽了後，隨時就叫人將樂器送過來，欲予伊演奏。侍中拒絕，大將軍就講︰「難得作伙氣氛誠好，何必推辭！」紹答︰「大將軍協政，通人②注目，我雖然官新語無夠大，嘛毋敢③穿公服，去作樂官咧作个代誌，恁若一定欲叫我來演奏，就請愛予我先將公服褪掉，換便服。」建議叫伊演奏个人，聽著安呢，只好惦④惦仔退出去。
【注釋】①一擺〔tsit8 painn2〕︰一次。②通人〔thong1 lang5〕︰眾皆。③毋敢〔m7 kann2〕︰不敢。④惦〔tiam7〕︰默。
《廿三》周嵩怒批刁協
【出處】世說新語〔六朝異譚〕方正篇。
【典故】周顗做吏部尚書个時，一暗佇省署得到急病，尚書令刁玄亮，足熱心趕緊營救，過無偌久了後，病小可①有較好，隔轉工②天光，伯仁个小弟仲智，得到消息趕來，拄仔入門，刁協就落牀放聲大哭，擱描說伯仁昨暝破病危急个情形。
仲智个性情介剛直，平常時對刁協个做人真感冒③，就出手巴伊，擱行來眠牀前，指著阿兄伯仁，連問病都無問，就直接講︰「佇朝中你佮④和嶠共款，赫呢有名，那會佮刁協這種人咧交往冽？」講煞斡頭⑤就走。
【注釋】①小可〔sio2 khua2〕︰稍微。②隔轉工〔keh4 tng2 kang1〕︰翌日。③真感冒〔tsin1 kam2 moo7〕︰有意見。④佮〔kah4〕︰跟。⑤斡頭〔uat8 thau5〕︰掉頭。
《廿三》何充摘奸發伏
【出處】世說新語〔六朝奇譚〕方正篇。
【典故】王含佇咧作廬江郡太守个時，操守①無介好貪污腐敗，伊个小弟王敦，欲替伊个阿兄講好話掩護，竟然佇大庭廣眾安呢②講︰「伊个兄哥佇廬江郡太守任內，政績誠好，廬江个百姓攏足佮伊呵咾③。」 王敦个主簿是何充，聽著伊安呢講，心裡足憤慨，就大聲應講︰「我何充是廬江个人，我所聽著个，佮你所講个完全是無共款④」王敦感覺歹勢只好惦去。當時王敦權有勢有，何充敢赫呢大膽，安呢佮嗆聲⑤，邊仔个人真替伊擔心，毋過伊攏無咧驚。
【注釋】①操守〔tshau1 siu2〕︰官譽。②安呢〔an1 nenn1〕︰ 這樣。③呵咾〔o1 lo2〕︰稱讚。④無共款〔bo5 kang7 khuan2〕︰不一樣。⑤嗆聲〔tshiang3 siann1〕︰抗議。
《廿四》鍾雅不避死難
【出處】世說新語〔六朝奇譚〕方正篇。
【典故】蘇峻帶兵攻入石頭城，文武百官攏四界①逃散，只有剩侍中鍾雅一个人，猶②擱陪伴佇明帝个身軀邊。 有人佮伊講︰「會進就進，該退就退，這是
古早人講个道理，你个個性傷過 正直，亂賊若來一定袂放你煞③，為啥咪無欲隨機應變，一定欲佇這等死？」 鍾雅就答講︰「朝廷有難，無力佮救，已經
失職，若擱藉口來逃避責任，恐驚董狐會佮我寫甲袂聽即④。」
【注釋】①四界〔si3 ke3〕︰到處。②猶〔iah3〕︰仍然。過於。③放你煞〔pang3 li2 suah4〕︰放過你。④袂聽即〔be7 thiann1 tsit4〕︰很難聽。
《廿五》何充外柔內剛
【出處】世說新語〔六朝奇譚〕方正篇。
【典故】何充佮庾季堅，攏是顧命个大臣。成帝去世了後，啥人欲繼承帝位，猶未決定，何充是建議由太子來接任，庾冰佮朝議攏認為外面个敵人當強，太子猶擱細漢①，並無妥當②，就改立成帝个小弟康帝繼位。康帝登基大會群臣，就問何充講︰「我會當繼承大業，是啥人③个建議？」何充答講︰「是庾冰个功勞，毋是我个力量，當時如果採用我个意見，恐驚④今旦日看袂著這呢盛大个場面。」康帝聽了表情有一點仔歹勢⑤。
【注釋】①細漢〔se3 han3〕︰年幼。②妥當〔tho3 tong3〕︰適宜。③啥〔siann2〕︰誰。④恐驚〔khiong2 kiann1〕︰恐怕。 ⑤歹勢〔phainn2 se3〕︰難為情。
《廿六》滿奮吳牛喘月
【出處】世說新語〔六朝奇譚〕言語篇。
【典故】滿奮个身體，一向攏無介好，袂堪即①見著風。有一擺伊去晉見武帝，晉武帝叫伊坐佇靠北爿②个窗仔跤，這个窗仔是用玻璃所作个，外觀看起來有疏疏落落个花樣，其實是密實，並袂通風。 滿奮坐落來面色一直無啥定著，武帝知影伊有這个毛病，就哈哈大笑，滿奮感覺足歹勢③，只好家己詼家己④講︰「我真親像是吳牛共款⑤，見著月亮也會喘。」
【注釋】①袂堪即〔be7 khan1 tsit4〕︰受不
了。②北爿〔pak4 ping5〕︰北邊。③歹勢〔phai2 se3〕︰不好意思。④詼家己〔khue1 ka1 ti7〕︰自我解嘲。⑤共款〔kang7 khuan2〕︰一樣。
《廿七》陸機出口成對
【出處】世說新語〔六朝奇譚〕方正篇。
【典故】陸機是吳郡个人，陸姓家族佇吳郡是一个大族。有一擺伊去拜訪王濟，王濟指著囥佇面頭前①个羊奶講︰「恁②江東有啥咪美味，會當③佮伊相比並？」
陸機就順口答講︰「有千里个蓴羹，末下个鹽鼓。」當時个人攏④呵佬⑤，真正是有名个絕對。
【注釋】①面頭前〔bin7 thau5 tsing5〕︰眼前。②恁〔lin2〕︰你們。③會當〔e7 tang3〕︰可以。④攏〔long2〕︰全都。 ⑤呵佬〔o1 lo2〕︰稱讚。
《廿八》嵇康廣陵絕響
【出處】世說新語〔六朝奇譚〕雅量篇。
【典故】嵇康因為博雅高逸，輕時傲世，得罪當①道，佇東市被處斬，當伊臨刑个時，神情攏無一點仔受著影響，交待厝裡个人，將伊个琴提來，就彈一曲廣陵散。彈煞②了後，伊講︰「以前袁孝尼欲跟我學廣陵散，我毋甘③，所以無教伊，現在廣陵散，真正是注定欲絕響④矣。」嵇康予人來判刑，並無具體个罪證，有一點仔冤枉，所以當時个大學生，三千偌人就聯合上書，請朝廷赦免伊，擱聘請伊來太學教冊，可惜朝廷並無允准。 嵇康被殺了後，晉文王想想咧，就感覺非常个後悔。
【注釋】①當道〔tong1 to7〕︰權勢。②煞〔suah4〕︰結束。③毋甘〔m7 kam1〕︰愛惜。④絕響〔tsuat8 hiang2〕︰絕傳。
《廿九》周顗自我解嘲
【出處】世說新語〔六朝奇譚〕雅量篇。
【典故】周顗跟周嵩兩个人是親兄弟，周嵩个個性率真豪爽，有天賦，定定持才傲物，才氣凌人。 周嵩平常時仔，足愛啉酒①，有一擺啉甲醉茫茫②，兩蕊目睭展甲足大丸，大聲罵伊个兄哥周顗講︰「你个才能，也無比恁小弟擱卡敖，那會赫呢③紅，真正攏是虛名。」周顗聽了並無反應。 過無偌久④，周嵩擱舉著一支點火的蠟燭，當面對周顗擲⑤過來，周顗馬上閃一邊，笑笑仔甲伊講︰「阿奴用火攻，真正是上个差的策略」。
【注釋】①啉酒〔lim1 tsiu2〕︰喝酒。②醉茫茫〔tsui3 bang5 bang5〕︰醉醺醺。③赫呢〔hiah4 ninn7〕︰那麼。④無偌久〔bo5 gua7 ku2〕︰沒多久。⑤擲〔tan3〕︰丟。
《卅》庾亮菩薩渡累
【出處】世說新語〔六朝奇譚〕言語篇。
【典故】庾亮有一擺進入佛寺，看著一座倒冽 个佛像，就嘆息講︰「這尊菩薩倒佇①塗跤②，大概是因為無閒③咧渡眾生，渡了已經悿矣④。」這个故事，一時傳為名言。
【注釋】①倒冽〔to2 le3〕︰躺著。②塗跤〔tshoo5 ka1〕︰地面上。③無閒〔bo5 ing5〕︰忙著。④悿矣〔thiam2 a3〕︰累了。
《卅一》顧和宰相之才
【出處】世說新語〔六朝奇譚〕雅量篇。
【典故】顧和初去揚州作官个時，一擺將車停佇州廳門外。周顗欲去揣①王丞相，拄好對彼經過，看伊動攏無動咧掠③家蚤 ，感覺奇怪，就將車開倒轉來，問顧和講︰「這裡底到底是啥咪物件？」顧和照常掠 伊个家蚤②，過一時仔，才舉頭看周顗，然後慢慢仔應講︰「這裡底个物件，實在足歹臆④。」周顗就真歡喜甲丞相講︰「佇恁州吏當中，有一个尚書令佮僕射的人才。」
【注釋】①揣〔tshue7〕︰找。②家蚤〔ka1 tsau2〕︰跳蚤。③掠〔liah8〕︰抓。④臆〔ioh4〕︰猜測。
《卅二》謝安圍棋如故
【出處】世說新語〔六朝奇譚〕雅量篇。
【典故】前秦派符堅率領百萬个大兵，想要一聲①將江南併吞，前鋒部隊離東晉个廣陵，差不多只有一百外里路，歸个②京城，山雨欲來風滿樓，人心浮動。這个時陣，謝安抑擱③佇官舍，佮人冽行圍棋消遣，忽然間，謝玄對前線派人送來一張批，謝安就先將批拆開看了後，惦惦仔攏無講話，照常擱倒轉去，續行③伊个棋。 在場个人客，心裡攏急甲凍袂條⑤，就問伊講︰「批頂是安怎講？戰爭是輸抑是贏冽？」謝安好人無戴，答講︰「囝仔輩佇前線，已經將敵人攏拍轉去。」說話个時个面色佮行動，攏完全佮平常時是共款。
【注釋】①一聲〔tsit8 siann1〕︰一口氣。②歸个〔kui1 e5〕︰整個。③抑擱〔iah4
koh4〕︰還在。④行〔kiann5〕︰下。 ⑤凍袂條〔tong3 be7 tiau5〕︰等不及。
《卅三》謝萬心無介意
【出處】世說新語〔六朝奇譚〕雅量篇。
【典故】支道林離開京城个時，時賢攏佇征虜亭為伊送行。 蔡子叔先到，坐伊个身邊。謝萬晏來坐較遠，無偌久①子叔有代誌暫時離座，謝萬就佔伊个位。等伊轉來②看謝坐佇伊个位，就甲挨倒③，害伊頭巾落掉非常狼狽。毋過，謝萬並無受氣，慢慢仔跁④起來，重新就坐，佮蔡講︰「你實在有夠奇怪，害我足無面子。」子叔答講︰「我本來就無想著你，有啥咪面子⑤。」兩人攏無在意。
【注釋】①無偌久〔bo5 gua7 ku2〕︰沒多久。②轉來〔tng2 lai5〕︰返回。③挨倒〔e1 to2〕︰推倒。④跁〔peh4〕︰爬。 ⑤無面子〔bo5 bin7 tsu2〕︰丟臉。
《卅四》謝安泛海吟嘯
【出處】世說新語〔六朝奇譚〕雅量篇。
【典故】謝安佇東山个時，定定嘛攏佮孫綽……等一寡人①，出海去耍水。 有一擺，逐個作伙坐船出海，無張持海裡紲起大風，船頂个人，攏驚甲面仔青恂恂②，主張船仔無趕緊開回袂使，只有謝安老神在在③，佇船仔頂繼續吟嘯。船長看伊赫呢鎮靜，就將船愈開愈緊。毋過風是愈來愈大，逐个因為坐袂稠，紲有一點仔慌亂，謝安就講︰「逐個若無卡鎮靜冽，恐驚想欲轉去都足困難。」眾人只好安靜落來，擱攏佩服伊个膽量，莫怪伊有法度來鎮安朝野。
【注釋】①一寡人〔tsit8 kua2 lang5〕︰一些人。②青恂恂〔tshenn1 sun2 sun2〕︰鐵青。③老神在在〔lau7 sin5 tsai7 tsai7〕︰神情鎮靜。
《卅五》謝安詠賦弭禍
【出處】世說新語〔六朝奇譚〕雅量篇。
【典故】桓溫佇新亭設宴，請朝中个官員，暗中埋伏甲兵，欲用安呢，來刣謝安佮王文度。 文度非常緊張，問安講︰「到時欲安怎①較好？」謝安就佮文度講︰「朝廷存亡就佇這逝②。」來到新亭文度愈驚，謝安愈鎮靜，入席就學洛陽書生，吟詠③一首「浩浩洪流，帶我邦畿。」桓溫一聽，大大感動，將伏兵喝開④，解除一場危機，文度佮謝安嘛安呢分出懸下⑤。
【注釋】①欲安怎〔be4 an1 tsuann2〕︰怎麼辦。②這逝〔tsit4 tsua7〕︰這趟。③ 吟詠〔gim5 iong2〕︰吟唱。④喝開〔huah4 khui1〕︰喊開。⑤懸下〔kuan5 ke7〕︰高低。
《卅六》王導胸懷磊落
【出處】世說新語〔六朝奇譚〕雅量篇。
【典故】庾亮佇領荊州个時，無戴無誌①對建康城有人謠傳消息講︰「庾公有拍算②欲東下石頭城。」 有人就去佮丞相王導講，有安呢个傳言，應該愛暗中作戒備卡好，以防止真正有意外來發生。 王導聽了就講︰「庾亮佮我雖然攏共朝咧作官，毋過阮兩个人，原來都攏足愛好布衣③、閒居个生活，對作官並無真大个趣味。 現在聽講伊欲來，消息若是真的个話，我甘願④頭戴角巾，馬上倒轉去⑤烏衣巷，過我無煩無惱个隱居生活，所以講，京城那就必要作啥咪樣个戒嚴冽。」
【注釋】①無戴無誌〔bo5 tai7 bo5 tsi3〕︰無緣無故。②拍算〔phah4 sng3〕︰計劃。③布衣〔poo3 i1〕︰粗布衫。④甘願〔kam1 guan7〕︰寧願。⑤倒轉去〔to2 tng2 khi3〕︰回去。 《卅七》阮孚偏好木屐
【出處】世說新語〔六朝奇譚〕雅量篇。
【典故】祖約好財物，阮孚愛木屐，兩個人長年隴咧認真經營，從來都毋捌停睏過。 講起來，好財物佮愛木屐①，佇生活中攏是一種負擔②，毋過兩個人一時間，嘛無法度分出懸下。 有人去拜訪祖約，看伊佇咧算財物，人客來袂赴收，歹勢予人客看著，就使坦攲③身，欲掩蓋，無介歡喜。 另外一個人去拜訪阮孚，看伊咧歕火 佇木屐頂上蠟，一面作一面怨嘆講︰「木屐收集這呢濟④，一生當中毋知會當穿幾雙？」心情看起來有夠好。 兩個人个輸贏，對遮就會當分出懸下。
【注釋】①木屐〔bak8 kiah8〕︰木鞋。②負擔〔hu3 tam1〕︰累贅。③坦攲〔than2 khi1〕︰傾斜。④這呢濟〔tsiah4 ninn7 tse7〕︰這麼多。
《卅八》羲之東床坦腹
【出處】世說新語〔六朝奇譚〕雅量篇。
【典故】太傅郗鑒在京口个時，派門生送信給丞相王導，說要在諸王子弟中，選一个囝婿。丞相講︰「你就去東廂房，隨便揀①一個。」 門生轉去佮郗鑒報告講︰「王家个少年仔，聽講有人欲來揀囝婿，就攏足自重②，只有一个少年仔，露出腹肚，倒③佇東牀頂面，無將伊當作一回事。」 郗鑒聽了真正歡喜講︰「這個介好④。」經過探聽，這个少年仔竟然是王羲之，就將查某囝⑤嫁予伊。
【注釋】①揀〔king2〕︰挑。②自重〔tsu7 tiong7〕︰矜持。③倒〔to2〕︰躺。④介好〔kai3 ho2〕︰最好。⑤查某囝〔tsa1moo2 kiann2〕︰女兒。
《卅九》石勒喜聽漢書
【出處】世說新語〔六朝奇譚〕識鑒篇。
【典故】石勒上黨个人，是匈奴苗裔个後代，號稱趙王，因為無讀冊毋捌①字，所以平常時仔，佇軍中有閒个時間，定定②會叫人讀漢冊予伊聽。 有一擺彼个人讀「楚漢相爭」个故事予伊聽，讀到酈食其勸劉邦立六國後代，以分化項羽
个時陣，大驚一趒③，就用手簹桌仔，大聲講︰「這聲著害矣，用這種奧步，劉季欲安怎有法度，通得著天下冽！」 無偌久，彼个人繼續擱讀到留侯張良，出面來大罵酈食其，甲伊阻擋，才放心落來，講︰「好佳再④，有這个人通靠，無就害了了矣。」
【注釋】①毋捌〔m7 bat4〕︰不識。②定定〔tiann7 tiann7〕︰常常。③一趒〔tsit8 tio5〕︰嚇一跳。④好佳再〔ho2 ka1 tsai3〕︰幸虧。⑤害了了〔hai7 liau2 liau2〕︰慘兮兮。
《四十》橋玄品鑒曹操
【出處】世說新語〔六朝奇譚〕識鑒篇。
【典故】曹操，伊个字叫孟德，小字阿瞞，本來是姓夏侯，因為伊个老爸夏侯嵩，過繼予宦官曹騰作養子①，所以才改姓曹，官作到丞相，封魏王，伊个大漢囝 曹丕篡漢，追尊伊為魏武帝。 曹操少年个時，有一擺②去見喬玄，喬玄个
官是尚書令，足敖 鑒定人物，當伊看著曹操，就佮曹操講︰「即馬③天下當咧大亂，群雄爭霸，你將來必定是一个亂世个英雄，治世个奸賊。」只可惜我个年紀已經這呢老！看袂著④你个富貴，毋過，我想欲佮我个囝孫，來交待予你。」
【注釋】①養子〔iong2 tsu2〕︰嗣子。②一擺〔tsit8 painn2〕︰一次。③即馬〔tsip4 ma2〕︰現在。④看袂著〔khuann3 be7 tioh8〕︰看不到。
63
》更多新聞《